ГОДЬВАРИ ЧЯЁРИ

Покамьяпэ  чявэскэ ек чяй. А лэскерэ дакэ  пэрэ ило исыс вавир. Закошнэпэ чяво даса: савья тэлэс? И вса кошенаспэс ёнэ. Шундя, шундя да лэнгирэ споры чявэскиро пхуро дад и ракирла: доракирасапэ ямэ дякэ. Кон далэ  дуе чяендыр хулаибныткэр, доя и явэла тыри ромни, мро чяворо!

— Шукар! Откхардяпэ тэрно чяво.

Подкхардя пхуро дад кэ пэ дуен пэскерэн  чяен и ракирла лэнгэ:

— Джан мрэ чяялэ кэ да дуй тэрнэ чяерья и помангэн лэндыр ваш тумарэ дакэ шутлага.

— Со ту, ямаро дадо ракирэса, кай  ёнэ да шутлага попэрэна, сык ив прэ пхув пасела!

— Джан, мрэ чяялэ!- тэрдо прэ пэскиро пхуро дад,- и пхэнэн да чяенгэ со мэ тумэнгэ ракирава.

Гинэ ёнэ кэ да чяя и пхэндэ со лэнгэ пхуро дад пхэндя. Перво тэрны чяй, саи покамьяпэ дакэ, ушундя пал шутлага и розлыджия вастэнца:

-Со тумэ, чяялэ ракирэна, кай да шутлага мэ лава? Сари чар покалыя ан дрэ фэлды. Шилало. Балваля со дэвэс пхурдэна. Мэ бы радо со тэкэрав ваш тумарэ дадэстэ и дакэ, али

Простинэн тумэ манн, нэ нанэ мандэ шутлага.

Загэнэ чяя кэ вавир тэрны чяй, роспхэндлэ со тшей. Вишундя да тэрны чяй со лакэ пхэндэ дуй пхэня и ракирла:

-Проджян, чяялэ, побэшен набутка.

— На,на! Всаек тутэ шутлага нанэ. Мэ джяса кхэрэ!- дрэ ек лав заракирдэ пхэня.

— Нэ, джян, чяялэ, дэвлэса,- проракирдя тэрны чяй, а кокори сыр угинэ чяя, скэдыяпэ и гэя андрэ фэлда тэродэл шутлага. Родыя, родыя и на попэя. Тэрды ек крапива и доя набут покалыя первонэ мразостыр. Скэдыя ей да крапива, яндя кхэрэ. Починдя ла чюрьяса, чюрдыя дрэ кипятко. Парнорэ дурик  розмардя, посолиндя и яндя дакэ до тэрнэ чявэскэрэ, со дриван ла камья.

Подыкхтя прэ да чятэ пхуро дад, салпэс и ракирла:

— Вокэ да манушни и явэла  тыри ромни, мро чяворо.

Мангэ важно на шутлага, а мануш годяса!