Ххх
Сыр газдав мэ да бакало
Прэ да свэнко романно,
Тэ взурнял да грай прэ штала,
Тэ взурнял гурув прэ штала,
Тэ взурнял ловэ гоно,
Соб тэрнэнгэ прэ разжива
Лаччо кхэр и длэнго грива
И кагня и папиня,
Балычче и гурувня,
Совнакай пхэрды кисык…
Со пхэндемас, соб исыс!
Дрэ фэлда грая,
А ив выпэя.
Зима джяла,
Шил лыджяла.
Со ту, чява,
Пурадян зява,
Мангав илэса,
Набэшь килэса,
Бида ямэндэ,
Джя палэ грэндэ,
Традэ сарэн
Кэ шатры до грэн.
Вурда зачюваса,
Кай тать потрадаса,
Миштэс задживаса,
Дой тут женинаса,
Ромня ту лэса,
Савья выкэдэса.
Бида ямэндэ,
Джя палэ грэндэ!
Ххх
Роспхэнэнти, гиля романэ,
Со тумэ прэ да свэто дыкхнэ:
Сыр хачкирна ива,
Сыр пхурдэн балваля,
Роспхэнэнти ямэнгэ, гиля.
Мэк тэрнэ романэ мануша
Ушунэн, сыр кхарэна вэша
Гожонэн чаерьен,
Мушкирдэн чаворэн
Пэскри бахт романи тэродэн.
Сыр грая пхув наенца марэн,
О лавэнца гиля манн кхарэн
Дрэ долэ о дрома,
Со хэлдытка рома
Пэрэ пхув палэ кхам прогэнэ.
Покамьяпэ чявэскэ ек чяй. А лэскерэ дакэ пэрэ ило исыс вавир. Закошнэпэ чяво даса: савья тэлэс? И вса кошенаспэс ёнэ. Шундя, шундя да лэнгирэ споры чявэскиро пхуро дад и ракирла: доракирасапэ ямэ дякэ. Кон далэ дуе чяендыр хулаибныткэр, доя и явэла тыри ромни, мро чяворо!
Ххх
Лачи ромни!
Нанэ со тэпхэнэс.
Отдэс пал латэ
Хэлда ту и вэш
И грэс отдэса
Самонэ лаччес.
Лачи ромни,
Нанэ со тэпхэнэс!
Про муй рани,
А ту подык ило.
Ту ласа
Замразеса, чаворо!
А дрэ шеро,
Нанэ со тэродэс.
А ту лачи!
Нанэ со тэпхэнэс!